Marka aad ugu horeyn isha la raacdo cinwaanka faaladan ayaa waxaa isweydiintaadu noqonaysa inaad u baahan tahay jawaab si weyn looga baaraan degay isla markaasna lagu sameeyay baaris taariikh qoto dheer oo ku qotonta isboortiga Soomaliya.
Inta badan dadka Soomaaliyeed ee sida weyn u xiiseeya isboortiga noocyadiisa kala duwan ayaa waxay mudooyinkan isweydiiyaan waxa ciyaaryahanka Soomaaliyeed ka hortaagan horumar dhinaca ciyaaraha sida ay horumar ugu talaabsadeen ciyaaryahanada haatan caalamka ka jira oo magac iyo maalba ku kasbaday heerka xirfadda ciyaarahooda.
Waxaa soo baxday in ciyaaryahanka Soomaaliyeed la iska indho tiro waxtarkiisa iyo sida looga faa`deysan lahaa hamiga uu ka leeyahay ciyaaraha si xirfadiisa uu ugu soo bandhigo garoomada caalamka , waxaad arkaysaa in ay afka dadka Soomaalida ka soo baxaan ereyo ay ku liidayaan in ciyaaryahanka Soomaaliyeed horumar uusan ku talaabsan karin ay tahay jimicsi iyo waqti dhumis uu ciyaaryahanka Soomaaliyeed ku jiro.
Ereyada ka soo baxaya waxmagaradka ka soo horjeeda horumarka isboortiga Soomaaliyeed una muqanaysa mid hoos loogu dhigayo hamiga niyadda halyeeyo fara badan oo u soo bixi lahaa wadanka ayaa waxaa ay tahay mid si xowli ah ku soconaysa , si middaas u noqoto mid daciifta waxaan rabaa in bahweynta isboortiga u soo bandhigo Taariikh kooban oo halyeeyada isboorti ay ka galeen Taariikhda isboorti si weyna loo xasuusto bal jaleec taariikhaha isboorti ee magaca iyo maamuuska soo hoyay baalka dahabigana dadka Soomaaliyeed ugu qoran ee halyeeyada ay ka mid yahiin marxuum Cabdulle Waasuge iyo Cabdi Bile Cabdi.
Halyeeyada aan kor ku soo xusay iyo kuwo kale oo dalalka Caalamka ka ciyaara ama ka xamaasha una matala wadamadooda waxay yahiin Soomaali ma` aha dad kale waan wada ognahay waxtarkooda iyo dadaalkooda geesinimada leh ee ay ka muujiyaan garoomada Caalamka bal u fiirso ciyaaryahanada ciyaaraha fudud oo ay iminka ku faanaan dalalka ugu waa weyn sida Ingariiska,Mareykanka iyo dalal ka mid ah carabta ,sidoo kale waxaa jira ciyaaryahano dhinaca Kubadda Cagta,Kubadda Miiska iyo Kubadda Koleyga oo iyaguna ay si weyn loola wareegayo ka dib markii dalalkii ay joogeen ee horumaray arkeen waxqabadkooda isboorti iyagoo durba ciyaaryahanka Soomaaliga ku soo jiidanaya dhaqaale iyo dhalasho ay siyaan ka dibna ku ciyaarsiiya magaca wadankooda si ay ugu soo hoyaan sumcad isboorti.
Ma kula Muuqataa haddii aad tahay qof ka damqanaya dib u dhaca , horumar la`aanta isboortiga Soomaaliya in ay tahay meel ka dhac ama gef weyn oo laga galayo ciyaaryahanka Soomaaliyeed marka la leeyahay guul ma gaarayaan ciyaaryahanada Soomaaliyeed ee calanka un ha geeyeen fagaarayaasha caalamka , Haddii ciyaaryahanka Soomaaliyeed uu helo tababar wanaagsan , deegaan nabdoon oo wax walba oo tashiilaad isboorti u dhan tahay haddii uu helo maamul u damqada ciyaaryahanka ka dhiidhiinaya guuldarada , dhiirigelinaya horumarkiisa waxaa hubaal noqonaysa in ay soo baxayaan ciyaaryahano ay ku faanaan dalka iyo dadka Soomaaliyeed islamarkaasna u horseeda dadkooda magac iyo maamuus halkaasina ku beenoobi doonto hadalada raqiiska ay meelaha la fadhiyaan kuwo aan rabin horumarka isboortiga Soomaaliya ,waxaase qormadan ku soo gabagabaynayaa ciyaaryahanka Soomaaliyeed ma xuma ee maamulka ayaa ku xun ciyaaryahankeena waxay noqon karaan kuwo aan ku tashano guulo ay soo hoyaan balse aan dhiirigelino maamul wanaag aan kula dhaqano.
www.isboorti.com
Saciid Ibrahim Hussein (BUUNA)
buuna@isboorti.com
+2525-982912
+2526-2-272145
Mogadishu-Somalia
Back
to home
Bottom
of the Page
Top
of the Page
